Reciter: Nadeem Sarwar
Tareekh Kay Kirdaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Dariya Ho Samandar Ho Tum …. Gohar Ho
Tum Mard E Qalandar Ho Sehra Mein Gul E Tar Ho
Tum Azm E Abuzar Ho Tum Zikr Ky Qambar Ho
Tum Hurr Ka Qabila Ho Tum Jaon Ka Lashkar Ho
Ay Gham Ky Alamdaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Rasta Nahi Manzil Ho Dharhkan Nahi Tum Dill Ho
Mazloom Ky Tum Hami Har Zulm Ky Qatil Ho
Insan Ki Azmat Ky Har Bab Mein Shamil Ho
Zulmat Ky Samandar Meun Tum Noor Ka Sahil Ho
Matam Ky Talabgaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Nisbat Hai Payambar Say Nisbat Tumhen Haider Say
Is Nisbat E Maula Say Tum Door Rahay Shar Say
Tum Ankh Milatay Ho Har Waqt Sitamgar Say
Jo Dars Mila Tum Ko Salman Say Buzar Say
Tum Roop Wohi Dharo Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Abbas Ky Parcham Say Seekhi Hai Wafadari
Ankhon Mein Tumharay Hai Emaan Ki Baidari
Qismat Say Mili Mazloom Ki Ghamkhuari
Zalim Kay Liye Ab Bhi Tum Taigh Ho Do Dhari
Mazloom Ky Gham Khuaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Zainab Ki Rida Tum Say Karti Hai Sawal Aisa
Kis Gham Mein Bahatay Ho Ankhon Say Lahu Apna
Kya Ghar Mein Tumharay Bhi Paigham Mera Pahuncha
Jis Deen Ky Lashay Pay Kam Aya Mera Parda
Laaj Us Ki Rakho Daikho Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Kya Dars Liya Tum Nay Akbar Ki Jawani Say
Kya Seekha Batao To Karbal Ki Kahani Say
Mat Behlo Khateebon Ky Alfaz O Muaani Say
Mehfooz Haqeeqat Ko Rakhna Hai Kahani Say
Ay Ilm Kay Mayaaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Masjid Ky Musalmano Maidan Kay Bano Ghazi
Tum Hurr Ki Tarah Mango Ek Rat Mein Azadi
Darbar Mein Zalim Ky Kiun Bantay Ho Faryadi
Sajjad Nay Jis Tarah Deewar E Sitam Dha Di
Deewar E Sitam Dha Do Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Tum Nehj E Balagha Ki Tafseer Mein Dhal Jao
Haider Ki Ghulami Ka Andaz To Apnao
Mazloom Tum Achay Ho Zalim Say Na Ghabrao
Haq Bat Jo Kehna Hai Sooli Pay Bhi Dohrao
Allah Kay Naqqaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Shabbir Ky Matam Mein Emaan Ki Hararat Hai
Yeh Ain E Ibadat Hai Yeh Ain E Shariyat Hai
Shabbir Ky Paikar Mein Islam Ki Nusrat Hai
Khanjar Kay Talay Daikho Qayem Jo Ibadat Hai
Maula Kay Tarafdaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Poocho To Zara Manzar Tum Sham E Ghareeban Ka
Ghar Jalta Tha Jab Ban Mein Us Waris E Quran Ka
Pamal Tha Jab Lasha Ek Bey Sar O Saman Ka
Kirdar Magar Kya Tha Us Waris E Quran Ka
Samjho To Samajhdaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Pyasa Tha Lab E Dariya Woh Lakht E Dill E Zahra
Ankhon Say Barasta Tha Ghurbat Mein Lahu Jis Ka
Woh Waqt Bhi Tha Sheh Ka Chay Maah Ka Ek Bacha
Hathon Pay Tarhapta Tha Pani Ka Na Tha Qatra
Us Waqt Py Jaan Waro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Hal Min Ki Sada Ab Bhi Hum Say Hai Yehi Kehti
Shabbir Ki Nusrat Ki Dill Mein Jo Tamanna Thi
Kya Ab Bhi Hai Woh Baki Jo Chah Thi Mola Ki
Awaz Wohi Dill Ki Ehsas Mein Hai Ab Bhi
Dehkay Huye Angaaro Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Tum Rah E Sadaqat Say Emaan Ki Hararat Say
Kirdar E Imamat Say Afkaar E Risalat Say
Tum Shaoq E Shahadat Say Mola Ki Inayat Say
Islam Ki Khidmat Say Mayar E Mohabbat Say
Tareekh Nai Likh Do Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Emaan Hai Azadari Hai Deen Ki Beydari
Jarrari O Karrari Hai Azm E Wafadari
Himmat Na Agar Hari Zinda Rahi Khuddari
Mil Jaye Gi Sardari Haider Ki Tarafdari
Kar Ky To Zar Daikho Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho
Rehan Py Sarwar Py Mola Ki Inayat Hai
Nohay Ki Azanon Mein Matam Ki Aqamat Hai
Sach Poocho To Dono Ki Har Sans Ibadat Hai
Ay Ahl E Aza Tum Ko Matam Ki Jo Dawat Hai
Munh Morh Ky Mat Jao Kis Bat Mein Tum Kam Ho
Ay Sheh Ky Azadaro Kis Bat Mein Tum Kam Ho