Reciter: Farhan Ali Waris

Jab Akhri Rukhsat Ko Chaly Sayed E Wala
Hum Sheer Ko Dukhtar Ko Bhi Allah Ko Sonpa

Phir Roty Huye Aspe Wafadar Sy Boly
Aa Tu Bhi Wida Bey Kas O Mazloom Sy Ho Ly

Ay Aspe Wafadar Ay Aspe Wafadar

Mana Keh Bahut Zakhm Hain Tery Bhi Badan Par
Asghar Ki Tarha Pyasa Hai Meri Tarah Muztar
Yeh Akhri Khidmat Hai Ada Kar Paye Haider
Gardan Py Meri Shimr Ki Chalny Ko Hai Talwar

Ay Aspe Wafadar

Tu To Mery Nana Ki Sawari Mein Raha Hai
Ab Tujh Sy Bicharny Ka Mujhy Ranj Barha Hai
Par Kya Karun Mehzar Mein Mera Naam Likha Hai
Raaqim Tera Marny Ko Chala Hai Mery Rahwaar

Ay Aspe Wafadar

Jab Girny Lagun Zeen Sy Maqtal Ki Zameen Par
Jab Nishtar Barasny Lagy Har Samt Sy Pathar
Aur Shimr E Laeen Tan Sy Juda Karny Lagy Sar
Zainab Na Kahin Dekh Ly Ban Jaiyo Deewar

Ay Aspe Wafadar

Lasha Mera Pamal Karen Gy Yeh Sitamgar
Mary Ga Koi Teer Koi Phairy Ga Khanjar
Rehny Nahi Den Gy Mera Malboos Badan Par
Tarhpy Ga Sar E Nehr Mera Bhai Alamdar

Ay Aspe Wafadar

Yeh Sun Ky Tarhapny Laga Kehny Laga Ro Kar
Behtar Hai Ky Jaan Dy Dun Main Kuffar Sy Larh Kar
Ay Kash Keh Chal Jaye Mery Halq Py Khanjar
Main Aap Py Jan Deny Ko Tayyar Hun So Baar

Ay Syed E Abrar

Dy Hukm To Is Faoj E Sitam Gar Ko Kuchal Dun
Naqsha Main Zara Dair Mein Maqtal Ka Badal Dun
Har Aik Sitam Gaar Ko Paigham E Ajal Dun
Ay Ibne Ali Hukm Hai Bas Aap Ka Darkaar

Ay Syed E Abrar

Yeh Sun Ky Huiin Tarr Mery Mola Ki Nigahen
Gardan Mein Barhy Pyar Sy Phir Dal Diin Banhen
Aur Aspe Wafadar Bhi Bharny Laga Aahen
Maola Ny Kaha Ja Tera Allah Madadgaar

Ay Aspe Wafadar

Ab Hashr Mein Hum Tujh Sy Mulaqat Karen Gy
Maqtal Mein Basar Aaj Sy Din Rat Karen Gy
Hum Khuld Mein Nana Sy Teri Bat Karen Gy
Royen Gy Tujhy Dekh Ky Sab Mery Azadar

Ay Aspe Wafadar

Rehan Nazar Ati Hai Jab Sheh Ki Sawari
Ankhon Sy Azadaron Ky Khoon Hota Hai Jari
Kehty Hain Keh Qurban Ho Jaan Tujh Py Hamari
Milta Nahi Tujh Jaisa Koi Shah Ka Gham Khuwar

Ay Aspe Wafadar

Join Khairilamal on WhatsApp

WhatsApp

Leave a Reply