Reciter: Syed Raza Abbas Zaidi

Sajdon Ki Chand Rat Azanon Ki Eid Hai
Duniya Ky Aaj Sary Jawanon Ki Eid Hai

Arsh Sy Farsh Py Har Rukh Sy Kamal Aata Hai
Ghar Mei Shabbir Ky Shabbir Ka Laal Ata Hai
Farsh Par Ban Ky Muhammad Ki Misal Ata Hai
Is Ki Khilqat Ka Jo Socho To Khayal Ata Hai
Samny Pehly Muhammad Ko Bithaya Ho Ga
Phir Khuda Ny Ali Akbar Ko Banaya Ho Ga

Hussain Ka Akbar

Hukm E Khaliq Hai Keh Hona Hai Nuzool E Akbar
Husn Hi Husn Nazar Aye Jidhar Jaye Nazar
Saj Gaye Dono Jahan Kitna Haseen Hai Manzar
Bich Gaya Farsh Py Jab Arsh E Bareen Tab Ja Kar
Umme Laila Ki Tamannaon Ka Mehwar Utra
Noor Ky Saye Mein Shabbir Ka Akbar Utra

Hussain Ka Akbar

Baap Sy Beti Ki Jab Pehly Mulaqat Hui
Ankhon Ankhon Mein Haseenon Ki Haseen Baat Hui
Noor E Akbar Ky Ujalon Mein Basar Raat Hui
Dekha Shabbir Ny Chehra To Adaa Naat Hui
Jaisa Chaha Tha Mila Hai Mujhy Beta Wesa
Mera Akbar To Nazar Ata Hai Nana Jaisa

Hussain Ka Akbar

Pai Jab Amad E Akbar Ki Khabar Zainab Ny
Muskuraty Huye Ki Rah Basar Zainab Ny
Shams Ki Goud Mein Dekha Jo Qamar Zainab Ny
Khud Sitaron Sy Utari Hai Nazar Zainab Ny
Bhai Sy Boli Bahan Aik Samajh Kar Day Do
Meri Aghosh Mein Bhaiya Mera Akbar Dy Do

Hussain Ka Akbar

Ly Ky Aghosh Mein Zainab Ny Kaha Kya Kehny
Tera Chehra Teri Har Aik Ada Kya Kehny
Teri Ankhon Mein Nazar Aye Khuda Kya Kehny
Khud Yeh Quran Bhi Deta Hai Sada Kya Kehny
Jab Sy Ghar Aaya Hai Tu Husn E Misali Ban Kar
Chand Dehleez Py Betha Hai Sawali Ban Kar

Hussain Ka Akbar

Dekha Abbas Ny Chehra Jo Ali Akbar Ka
Boly Ek Aur Sipahi Mery Lashkar Ko Mila
Roab Ankhon Mein Nazar Aaya Jo Apny Jaisa
Kam Sini Mein Yeh Chalan Dekh Ky Ghazi Ny Kaha
Kaisy Talwar Chalaty Hain Sikhaun Ga Isy
Dekhna Sani E Abbas Banaun Ga Isy

Hussain Ka Akbar

Kaha Shabbir Ny Sajjad Sy Aao Dekho
Ali Akbar Ki Nazar Dhund Rahi Hai Tum Ko
Choty Bhai Ky Qareeb Aya Barha Bhai Ko
Muskuraty Huye Akbar Sy Kaha Kaisy Ho
Hai Qasam Husn Ki Tu Itna Haseen Hai Akbar
Tery Chehry Sy Nazar Hat’ti Nahi Hai Akbar

Hussain Ka Akbar

Dekho Zeeshan O Raza Kaisa Shabab Aya Hai
Nojawani Ky Gulistan Mein Gulab Aaya Hai
Is Liye Chehra E Akbar Py Naqab Aya Hai
Koi Na Keh Dy Muhammad Ka Jawab Aya Hai
Sath Shabbir Ky Akbar Jo Kahin Jaty Hain
Us Ky Deedar Ko Yousuf Bhi Chaly Aty Hain

Hussain Ka Akbar

Join Khairilamal on WhatsApp

WhatsApp

Leave a Reply